Eʋe ɣleti ŋkɔwo kple woƒe dzɔtsoƒe

Gbeƒãɖeɖe Index

Le blema le eʋeawo gbɔ tsã vayi la, eʋeawo xlea ɣletiwo toa xexeme nudzɔdzɔwo dzi. Xexeme nudzɔdzɔwo abe tsidzaɣi looo, dzobiɣi looo, kuɖiɣi looo ... alo dɔléle aɖewo ɣi. Ateŋu nye ati alo gbe aɖe ƒe seƒoƒoɣi ŋutɔ gɔ hã faa. Wodoa dzesi xexeme nudzɔdzɔ siawo vaɣi toa woƒe ŋkeke ene (4 ) xexlewo me eye esia ɖea mɔ nawo woteŋu xlea Ƒè ɣletiwo hã wodzea nudzɔdzɔwo dzi pɛpɛpɛ.

 Ƒè ɣleti wuietɔ̃ (13 ) yenɔ Ʋeawo gbɔ vayi hafi woƒe gododo kple dzukɔ bubuwo abe Ashãnteawo alo Yevuawo wɔɛ bena Ƒè ɣleti wuieve (12 ) ƒe tɔtrɔ va dze eʋenyigba dzi.
Eʋe Ƒè ɣleti wuietɔ̃ (13 ) siawo enye: Dzove, Dzodze, Tedoxe, Afɔfiɛ, Dame, Masa, Siamlɔm, Dasiamime, Anyɔnyɔ, Kele, Adeamekpɔxe, Dzome, Ƒoave.

1- Dzove:
Ɣleti sia ƒe ŋkɔ tso xexea me ƒe dzoxɔxɔ si nɔa anyi le ave siwo menye avexo, avetsu alo ave tsitsiwo o la ƒoƒo gɔmedzedze me. Le dzoxɔxɔ sia ta, woyɔa ave siawo be " Dzo-ve " si va trɔ zu Dzove. Ɣleti sia xɔa ŋkeke blaeve-vɔ-enyi (28).
2- Dzodze: 
Ɣleti sia hã nye kuɖiŋɔli ɣleti abe dzove ene. Wotɔa dzo ave siwo woƒo la eye wodzraa anyigba ɖo hena nukuwo ƒaƒa alo dodo. Xexeame xɔa dzo ŋutɔ; le esiata woyɔnɛ bena Dzodze. Ɣleti sia hã xɔa ŋkeke blaeve-vɔ-enyi (28).
3- Tedoxe:
Ɣleti sia xɔ ŋkɔ tso " Tedo " si adãtsi gbãtɔwo xena la me; ale wòzu Tedoxe. Ɣleti sia xɔa ŋkeke blaeve-vɔ-asieke (29).
4- Afɔfiɛ:
Ɣleti sia xɔ ŋkɔ tso alesi anyagba xɔa dzo vevie hefiaa afɔ na amewo ta; ale " Afɔ-fiã " va zu Afɔfiɛ. Ɣleti sia xɔa ŋkeke blaeve-vɔ-enyi (28) nenye Ƒe blibo la katã axɔ ŋkeke alafã-etɔ̃-blaade-vɔ-atɔ̃ (365) alo exɔa ŋkeke blaeve-vɔ-asieke (29) nenye Ƒe blibo la katã axɔ ŋkeke alafã-etɔ̃-blaade-vɔ-ade (366). 
5- Dame:
Ɖe tsidzadza ta la, atiwo kple gbewo dea ama nyuie " Dea-ama " va zu Dame. Ɣleti sia xɔa ŋkeke blaeve-vɔ-enyi (28).
6- Masa:
Ati aɖe si woyɔna be Masɛ la ƒoa se le ɣleti sia me eye eƒe seƒoƒowo hea kpeƒoame, vuvɔ kple taɖuame vaa ame dzi. Ale ɣleti sia xɔ ŋkɔ be Masɛ ɣleti si va zu Masa. Ɣleti sia xɔa ŋkeke blaeve-vɔ-enyi (28).