Eʋeawo ƒe tɔtrɔŋkekewo

Kwasiɖa ŋkeke adretɔ ( Dzoɖa, Blaɖa, Kuɖa, Yɔɖa, Fiɖa, Memleɖa kple Kwasiɖa ) menye Eʋeawo ƒe tɔtrɔ ŋkekewo tutuutu o, ke boŋ esia tso 

Ablotsi yevuawo kple Asãnteawo gbɔ. Le Eʋeawo gbɔ la, ŋkeke ene (4) sia ŋkeke ene tɔtrɔ vana, si gɔmee nye bena ŋkeke ene (4) zi eve (2) nye Ablotsiyevuawo alo Asãnteawo ƒe Kwasiɖa ɖeka (1) kple ŋkeke ɖeka (1). 
Ŋkeke ene siawo nye: Asiamigbe, Aƒenɔegbe, Asiatuigbe kple  Asigbe . Gbesigbe Asi ɖi le Eʋedu aɖe me la, nyea Asigbe eye ame aɖeke meyina dɔwɔƒe o. Woga yɔna esia bena Asime elabena gbemagbe enye amewo katã ƒe ta kpe gbe eye amewo bia nuwo ƒe asita sena. Gbemagbe kee nye ɖiɖeme ŋkeke. Nyɔnu siwo ayi ɖe asime la, yia asime. Ŋkeke sia enye Asãnteawo ƒe ɖiɖeme ŋkeke si woyɔna bena kwasiɖagbe ŋkeke vɔ wotɔ nye ŋkeke adretɔ. Eʋeawo menya nusi nye KWASIƉA (Week / Semaine) o.

Ne ɣe ( agu ) dze eye ɣe gaɖo to la, ekema ŋkeke ɖeka vayi. Ŋkeke siwo wotia be wonye ŋkeke nyuiewo la, wonye Asigbe kple Asiamigbe. Le ŋkeke eve (2) siawo dzi la, wowɔa Mawunuwo lena, eya enye bena, wona nu trɔ̃wo le ŋkeke siawo dzi. Ŋkeke vɔ̃wo nye Aƒenɔegbe kple Asiatuigbe, ŋkeke siawo nyea aɖiƒie vɔ̃wo ƒe ŋkeke kple trɔ̃ vɔ̃wo ƒe aƒe vagbe. 

Wobua ŋkeke nyuiewo bena wonye Mawutɔ eyata wona nu Mawuwo le ŋkeke siawo dzi. Ke le vɔ̃awo dzi la, woyia busu na ame siwo le dɔlèm la.

Ne ɣleti dze dzi, eye woli ʋũu heva bu vie la, ekema wogblɔna bena ele Ɣleti ɖeka. Ne ɣleti do te va vie la, wogblɔna be eɖo Taƒo. Emegbe la eva ɖoa titina. Ne zã le dodom hafi wòle dzedze la, ekema wogblɔna be eɖo To nu.  Ne zã do ŋutɔ hafi ɣleti la do la, ekema ele agu dzem. Ne ɣleti la gaka la, eteƒe medidina hafi bubu gadona o.

Ne Ʋemeviwo dze tegblesisi gɔme la ( Dzove ), ekema wodze Ƒe bubu hã gɔme. Ne woho te, eye dzo bi gbe siwo katã ƒu ( Ƒoave ) la ekema Ƒe la wu enu.