Vidzidzi kple vidzidzi megbe kɔnuwo

Gbeƒãɖeɖe Index

a - Vidzidzi megbe:

Nenye nyɔnu dzi vi, le ɣleti eve megbe la, vinɔ la saa dzonu ɖe ŋui eye wotsɔa avɔ nyuiewo tana, fɔa kɔsɔkɔsɔwo kplana, tsɔa alɔnugawo dea alɔ nu, 

blaa ta kple taku nyuiewo bena woayi ɖado gbe na ame siwo va na nui le vidzixɔ me eye woada akpe na wo; elabena esi wòdzi vi la, woawoe nye ame siwo va du tsi nɛ, tu wɔ nɛ, eye ame aɖewo na ami dzẽe. Esiata wodea amesiame gbɔ, daa akpe nɛ be, esẽ ŋu loo, nyitsɔ aɖe ƒe dɔ, mìawoe kpɔ ame ta loo. Wogblɔna na vinɔ la bena, “ Wo ŋu nu wɔ nu gbemia ” (gbeaɖegbe). Ame si ke mewɔ naneke vɛ le vidzixɔ me o la, ne ede eƒe me la, ewɔa ŋukpe na wo eye vɔ la, eya ko wòkpɔ mɔ aɖa nu na srɔ̃a wòaɖu.

Egbe la, womegale ewɔm o, blewublewu la ava trɔ̃. Enye koko na nyɔnu aɖe ne méda akpe o. Ne wo kpakple ame aɖe wole dzre wɔm la ekema woadzui nɛ agblɔ bena, “ Amee nenye ɖee ne esime nedzi vi la, ne wo hã eda akpe, ame dzodzroa ! ”. Ame geɖewo medaa akpe o le ŋutinuwo ƒe wo si manɔmanɔ ŋuti.

b - Eveviwo:

Ne ame aɖe dzi eve la, gbã vinɔ la mele naneke ɖu ge o eye mele nu hã ƒo ge o. Nenemakee nye vitɔ la hã, vaseɖe esime ame bubu aɖe si dzi eve abe woawo ene la nava eye woaxɔ adzɔ hoka blaeve-vɔ-eve le wo si. Emegbe, ame la atsɔ tsi ayi ŋutsu la gbɔ axlẽ ɖeka, eve, etɔ̃ vaseɖe asieke eye wòatsɔ tsi la atɔ nu nɛ; awoe na nyɔnu la hã nenema. Emegbe la, atsɔ nuɖuɖu eye eya ŋutɔ vinɔ kple vitɔ la. Ne ewɔ nu sia vɔ la, ekema wokpɔ mɔ aɖu nu, aƒo nu. Woyɔa wɔna sia bena: “ Tsitɔtɔnu ”. Amesi he vi na wo la, ele be woana dehae  woaklɔ asi elabena ne womena ahae o la, mekpɔ mɔ atɔ bli le agba me o. Ne etɔ bli la, ɖeviawo ƒe lãme masẽ akpɔ o.
Woɖoa ŋkeke emegbe bena le asigbe la, yewoawɔ eve. Wohoa de eye wonɔa aha kpam. Gake ame aɖeke medzea aha la o. Ne wokpɔ be aha si wokpɔ ɖi sɔ gbɔ eye ŋkeke si woɖo la hã ɖo edzi la, wotsɔa aha la vaa aƒee eye woƒlea lã hã dana ɖi, yi ɖatsɔa te hã le boƒo fuu va aƒee.
Ne ŋkeke la ɖo edzi la, vitɔ kple vinɔ la ƒe ƒometɔwo vana. Evedzila xoxo si wɔ nua na wo gbemagbe la, hã ava kple srɔ̃a. Ne ŋu ke la, evenɔ xoxo la gblɔna bena woava ƒle aƒe si me wole la le ye si.