Nuka le asiwò ?

Ŋutsua ɖe nɔ dua ɖe me gbeaɖegbe. Ga geɖee nɔ esi. Amea ɖewo gblɔ be eyae nye kesinɔtɔ gãatɔ nɔ̃ ŋuto mã me. 

Agble ewo nɔ esi, eye eƒe lãwo hã sɔgbɔ. Nyiwo nɔ esi fũu. Etu xɔ gãawo ɖe dua me, eye wonye dɔmenyotɔ gãa ɖe. Vi eve nɔ esi. Wónye ŋutsuviwo. Tsitsitɔ xɔ ƒe blaaeve-vɔ-atɔ̃, eye ɖevitɔ xɔ ƒe blaaeve-vɔ eve. Tsitsitɔ ŋkɔe nye Kofi Gameli eye ɖevitɔe nye Yawo Aguedze. Gbe ɖeka wo fofo yɔ wo hegblɔ na wo bena: "Fifia mietsi. Mieganye ɖeviwo o.
Eyata miyi xexeame ɖadze agbagba na miaƒe ŋgɔgbe." Ena ga ɖeviawo eye wodo mɔ wo kple nya siawo bena: "Le ƒe atɔ̃ megbe la, megale miayɔ ge va gbɔnye ne miana nutsotso tso miaƒe agbagbadzedzewo ŋuti. Ale ɖeviawo dzo. Le ƒe atɔ̃ megbe tutuutu Gameli kple Aguedze trɔ̃ gbɔ va wo fofo gbɔ. Wo fofo kpɔ dzidzɔ ŋutɔ. Eyɔ wo gbe ɖeka ŋdi kanyãa ɖe, eye wose ɖesiaɖe ƒe nutsotso tso eƒe dɔwɔwɔ ŋuti.
Kofi gameli ƒo nu gbã. Egblɔ na fofoa be: "Fofonye, esi medzo la, meyi ɖanɔ Lome. Metsɔ nye ga la ƒle tɔmelã hedzra le kɔƒewo kple du sɔewo me. Mewɔ dɔ sesĩe ŋutɔ. Eteƒe medidi o, ga la dzi ɖe edzi zi geɖee. Ale meƒle nu geɖewo. Fifia xɔ atɔ̃ le asinye le Lome. Nye lãwo hã sɔgbɔ. Nyiwo, alẽwo kple gbɔ̃wo le asinye fũu. Nye nyikpo le Anexɔ eye nye alẽwo kple gbɔ̃wo le Agu. Sɔ̃ eve le asinye,eye gasɔ̃ hã le asinye. Meƒle agbatsɔʋu enyi, eye tsaɖiʋu eve le asinye. Agbatsɔʋu le ame geɖee si le Lome.
"Fofoa kafui, eye wodo ŋusẽe heda akpe nɛ be ewɔ dɔ nyateƒetɔe. Azɔ̃ Yawo Aguedze hã na nutsotso tso eƒe dɔwɔwɔwo ŋuti. Nusi wogblɔ la nye esi: "Gbã la meyi ɖanɔ Peki ƒe ɖeka. Teƒea sẽ ŋutɔ. Dɔ menɔ dua me o. Tsi medza le ƒe ma me o, ale dɔwuame gãa ɖe va. Eyata medzo le afima yi Ho. Ho hã menyo nam tutuutu o. Meƒle agblemenuwo dzra le afima eye mekpɔ ga via ɖe." Le ɣleti ade megbe ko medzo le Ho hayi Kpando. Abe alesi ne nenyɛ ene la, Kpandoe nye eʋedu gãatɔ le Amuta la to. Tɔmelã geɖee le Amuta la me fifia. Ale meƒle akplɔʋu lolo eve na lãɖeɖe. Medi lãɖelawo de ʋuawo me, eye meƒle asabu hã na wo. Dɔ la dze edzi nam ŋutɔ.Ehe ga geɖee vẽ nam. Fifia xɔ le asinye le Ho, Kpando kple Keta. Tɔdziʋu sɔe eve hã le asinye. Metsɔwo le amewo kple agba vovoovowo tsɔm tso Akosombo le Kpando Krachi kple Tamale yim. Ga geɖee le asinye fifia, eye nye hã meƒle tsaɖiʋu eve."
Wo fofo da akpe nɛ, eye wokafu eya hã le eƒe agbagbadzedze ta. egaƒo nu na wo le dɔwɔwɔ ƒe vevienyenye ŋuti. Gameli kple Aguedze he nunana geɖee vɛ̃ na wo fofo kple wo dada, eye wonɔ anyi kple wo dzilawo le dzidzɔ gãa kple ŋutifafa me.