Fofonye fia agbledede mí viawo

Gbe ɖeka ŋdi kanya fofonye yɔm hegblɔ nam be yele nye kple tsɛnye Kɔdzɔ kplɔ ge yi ɖe agble le ŋdinuɖuɖu megbe. 
Danye na ŋdinuɖuɖu mí míeɖu. Fofonye bia mí be míeɖi ƒo mahã ? Míeɖo eŋu nɛ be: " Eee, míeɖi ƒo." Fofonye hã ɖu eƒe ŋdinuɖuɖu. Le esia megbe la, wotsɔ agblenu eve kple krante eve nam, eye menyre wo nyuie. Etsɔ go hã nam Metsɔ go la yi danye gbɔ, eye woku tsi de eme nam. Fofonye hã nyre eƒe krante kple agblenu. Tsɛnye Kɔdzo metsi tutuutu o. Exɔ ƒe enyi ko; gake mía fofo na eya hã tsɔ krante sɔe aɖe. Danye hã tsɔ wɔ, gali kple dze de kotoku sɔe aɖe me, eye wotsɔe na tsɛnye Kɔdzo. Kɔdzo tsɔ kotoku la ku kɔ. Fofonye tsɔ eƒe agblekotoku kple eƒe tu eye woɖe dzo ɖe ze kakɛ̃a ɖe dzi. Ale míedzo yi agble ŋdi ma.Míedo dzò ɖe míaƒe agblexɔ me. Esia megbe míewɔ dɔ tso ŋdi ga asieke vaseɖe ga ɖeka. Dɔ nɔ mía wum ŋutɔ, eyata fofonye na meɖa nu. Míeɖu nua le ga ɖeka kple ga eve dome. Le nuɖuɖu la megbe fofonye na miedzudzɔ vie, elabena ŋdɔ nɔ ʋuʋum akpa.
Míeyi míaƒe dɔwɔwɔ dzi le ga etɔ̃ me. Esi ga atɔ̃ ƒo ko la, nye kple tsɛnye míeyi ave sɔe aɖe me ɖafɔ nake. Míebla nakeawo hetsɔ wo va aƒee. Danye kpɔ dzidzɔ ŋutɔ be míetrɔ gbɔ. Ekpɔ dzidzɔ le nakeawo hã ŋuti. Míele tsi, eye le esia megbe mieɖu nu. Le fiẽnuɖuɖu megbe la, fofonye gblɔ ŋutinya vivia ɖe na nye kple tsɛnye. Míemlɔ anyi fiẽ ma kaba elabena ɖeɖi te mía ŋu ŋutɔ.Le ŋufɔke la, fofonye gakplɔ mí yi ɖe agblea na míaƒe dɔwɔwɔ la dzi yiyi. Ale mía fofo fia agbledɔwɔwɔ mí tso mia ɖevime ke. Agbledede nye dɔ nyuia ɖe.