Fo Atsu ge le ati dzi

FO ATSU GE LE ATI DZI🌼

Gbe ɖeka ɣetrɔ la, Senyo kple Foli tso suku yina aƒe me. Esi woɖo agble aɖe to la, wose nane ge gbi le agble la me.
Senyo bia Foli be: 'Foli, nuke ge gbi nenema?'

Foli: Maŋgoe
Senyo: Mangoe ge gbi nenema? Menye maŋgoe o.
Foli: Maŋgoe. Maŋgoe. Va miyi ɖakpɔe ɖa.
Woƒu du yi teƒea. Woakpɔ kasia, Fo Atsu enye esi le anyigba. Ege tso maŋgoti dzi. Emlɔ anyigba kpoo. Ewɔ abe ɖe wòku ene. Ɖeviawo vɔ ŋutɔ.
Foli be: 'Senyo, midzo, midzo. Va mi dzo la. Va misi dzo!'
Senyo be: 'Ao. Na miyi ɖayɔ amewo vɛ.'

Enumake Senyo kple Foli si du yi aƒe me ɖayɔ amewo. Amewo hã dze mɔ enumake. Wova ɖo agblea me. Wo kpɔ Fo Atsu le anyigba. Eli kpoo. Enumake wokɔe. Wokɔe ɖɔɖɔɖɔ elabe eƒe ata ɖeka ŋe. Wokɔe yi lɔrimɔ to. Ata si ŋe la nɔ evem ŋutɔ.

Eteƒe medidi o, lɔri aɖe va tɔ. Wokɔ Fo Atsu de eme. Ata si ŋe la ga nɔ evem ko. Enɔ avi fam. Amesiwo nɔ afima la dometɔ geɖewo hã nɔ avi fam. Senyo kple Foli hã nɔ avi fam. Ʋua ho. Ekɔ Fo Atsu yi atikewɔƒe.
Eteƒe medidi o, woɖo atikewɔƒe la. Wokɔ Fo Atsu ɖɔɖɔɖɔ mlɔ anyigba. Woyɔ dɔkta vɛ. Ɖɔkta la na wokɔ dɔnɔ la mlɔ aba dzi. Egblɔ na wo be eƒe lãme le sesê ge. Kpɔ dɔnɔ la gbɔ enumake. Ena atikee eye wòna womlɔ anyi kpoo.

Fo Atsu nɔ atikewɔƒe la ɣleti eve. Amewo va kpɔnɛ ɖa enuenu. Amesiwo va kpɔnɛ ɖa la dometɔ aɖewo tsɔa aŋuti vanɛ. Ɖewo tsɔa akɔɖu vanɛ. Ke ɖewo hã va kpɔnɛ ɖa kple asi ƒuƒlu. Le ɣleti ɖeka megbe la, eƒe ata ɖeka si ŋe la ɖɔ ɖo vie. Le ɣleti eve megbe la, eƒe lãme sê keŋ. Ale dɔkta la ɖe asi le eŋu. Esi Fo Atsu va ɖo aƒe me la, zi tɔ. Ame geɖe do vivi ɖe eŋu. Senyo kple Foli hã do vivi ɖe eŋu. Amesiame kpɔ dzidzɔ be eƒe lãme sê keŋ.

Gbe ɖeka la, Fo Atsu wu koklo, dɔku, kpakpaxe, kple tsaxe. Dadaa ƒo detsi viviwo eye wòɖa nu zã. Eyɔ amewo wova ɖu nu. Senyo kple Foli hã va ɖu ɖe. Esi wo ɖu nua vɔ la, Fo Atsu tsɔ nubablɛ aɖe na Senyo. Etsɔ nubablɛ ɖeka na Foli hã. Nunana nyuiwo sɔŋ nɔ nubablɛ siawo me. Ɖeviawo dometɔ ɖesiaɖe kpɔ dzidzɔ le eƒe nunana la ŋu. Ɖevi nyui xɔa nunana nyui.