Nukata wogblɔa be Eʋenyigba ma ɖe Nigeria-Benin-Togo-Ghana me ɖo ?

Gbeƒãɖeɖe Index

Abe alesi míado dzesie le nɔnɔmetata siawo (esiwo nele gɔme) dzi ene la, dukɔ siawo (Ewe-Aja-PhlaPhera-Fon) si míeyɔna le eʋegbe me be (Eʋeawo-Adzawo-Ƒlaƒeɖatɔwo-Fɔawo), nye dukɔ ɖeka si zɔ̃ mɔ le hatsotso ɖeka me heva ɖo ƆYƆ alo Oyo (le Nigeria) hafi ga ʋu dzo le ƆYƆ, yiɖe IFẼ (le Nigeria) emegbe, heva dze KETU (le Benin). Emegbe dukɔ siawo ga ʋu dzo le teƒe ma hã heyi ɖa nɔ TADO (le Togo) kple NƆTSIẼ (le Togo). Ame aɖewo tso fiaɖuƒe ɖe TADO eye ɖewo hã tso fiaɖuƒe ɖe NƆTSIẼ.

Ɣeyiɣi dzidzia ɖewo megbe la, amesiwo nɔ TADO ƒe hatsotsoa me la, ʋu dzo le teƒe ma hã. Ɖewo yi tso fiaɖuƒe ɖe ALLADA he tu Allada dua kple Ouidah dua, Kutɔŋu (Cotonu:  ŋkɔ sia nye ablotsi yevu siwo tso Frãns la ƒe nuyɔyɔ). Emegbe ame aɖewo ga ʋu le Allada heyi tso fiaɖuƒe ɖe AGBOME ( Abomey: ŋkɔ sia nye ablotsi yevu siwo tso Frãns la ƒe nuyɔyɔ), eye amea ɖewo yiɖa tso fiaɖuƒe ɖe XƆGBONU alo Hogbonou (Porto-Novo: ŋkɔ sia nye ablotsiyevu siwo tso Portugal la ƒe nuyɔyɔ). Amesiwo nɔ NƆTSIẼ hã kaka emegbe ɖe wòƒe Fia Agɔkɔli ƒe ŋutasesẽ ta. Amesiawoe nye Eʋeawo le amadede aŋgbãɖiɖi me le nɔnɔmetata si kpɔm mìele la dzi. Adzawo susɔ nɔ TADO  dua me; Ƒlaƒeɖatɔwo nye amesiwo le amadede gbemu me. Ƒlaƒeɖatɔwo nye amesiwo tu Allada, Kutɔnu kple Ouidah duawo. Fɔawo nye amesiwo ga ʋu dzo le Allada heyi tu Agbome (Abomey) fiaɖuƒe kple Xɔgbonu alo Hogbonou (Porto-Novo) fiaɖuƒe la. Dukɔ siawo ( Eʋeawo - Adzawo - Ƒlaƒeɖatɔwo - Fɔawo ) ƒe nuwɔnawo (dekɔnuwo) ɖia ɖeka eye wòƒe gbe gbɔgblɔawo hã ɖi wonɔɛwo esia tae Ablotsi-yevuawo yɔa wò bena GBE dolawo.