Eʋeawo ƒe ʋuʋu le Ŋɔ̃tsié hena Eʋenyigbã ƒe takeke

Gbeƒãɖeɖe Index

Edze Eʋevi ɖesiaɖe be woanya nane tso Eʋeawo ƒe dzɔtsoƒe ŋuti. Esia awɔe be woate ŋu agblɔ nya tso eƒe Eʋevinyenye ŋuti kakaɖedzitɔe.  Afisi Eʋeawo le egbe la, menye afimae wonɔ tso blema ke o. Wonɔ teƒe vovovowo kpɔ hafi va ɖi te ɖe afisi wole alo míele egbe anye ƒe akpe ɖeka (1000) kple edzivɔwoe nye esi vayi [ Le Ƒe 1001 tsɔyi Ƒe 1100 me]

Amea ɖe menya afisi tutuutu Eʋeawo dzɔ tso hafi vayi ɖa dze Afrika ƒe ɣedzeƒe abe alesi mía Tɔgbewo tu xo la namí vayi ene o, eye tɔsisi gã Kuara alo Niger nutowo mee woga va nɔ emegbe kple dukɔ geɖewo abe Anagoawo, Gɛ̃awo, Adãwo kple Bluawo ene. Emegbe woga ʋu dzo le teƒema heyi dze teƒe si woyɔa be KETU alo Ɔyɔ (ŋkɔ si do tso Eyɔ alo Yɔ me, ɖe Yɔtsi sɔgbɔwo si nele afima la ta) eye woga yɔna Ketu hã be Amedzɔƒe alo Mawuƒe .

Eʋeawo mega teŋu nɔ afima hã o, ke boŋ woga ʋu. Le ʋuʋu tso afima la, wova ma ɖe akpa gã eve. Akpa ɖeka yi ɖanɔ Mɔnɔ tɔsisi la ŋu eye woyɔ teƒe si wonɔ la bena Tado. Akpa evelia yi ɖanɔ Haho kple Mɔnɔ tɔsisi dome eye woawo yɔ woƒe nɔƒe la be Ŋɔ̃tsié, teƒe si le Lome kple Atakpame dome. Amewo yɔe be Glime alo Agbogbome esi  wonye be woɖo gli ƒo xlãe la ta, eye amea ɖewo yɔe be Agbome le agbo ɖeka si le enu la ta. Amea ɖewo ya yɔe be Kpome le eƒe dzoxɔxɔ ta. Ke Hogbeƒe nye eƒe ŋkɔ si dukɔwo katã nya nɛ. Afimae Aŋlɔawo ƒe Hogbetsotsozã  kple Eʋedukɔ bubu siwo hã ɖua Hogbezã xɔ ŋkɔ do tsoe.

Dukɔ siwo nɔ Ŋɔ̃tsié du la mee nye Aŋlɔawo (GHANA), Beawo (TOGO), Asogliawo (GHANA), Watsiawo (TOGO-BENIN), Gbiawo (GHANA), Aƒlawoawo (TOGO-GHANA),  Aguawo (TOGO), Danyiawo (TOGO) kple bubuawo katã. Woyɔa dukɔ siwo katã ʋu dzo le Ketu heva tso du le Ŋɔ̃tsie kple Tado bena " Eʋeawo " eye wo katã wodona eʋegbe ɖeka. Katsotso si nɔa wome le woƒe mɔzɔzɔwo me woe be gbe gbɔgblɔ̃ bubuwo abe Fɔ̃gbe, Adzagbe, Ƒeɖagbe va nye gbe bubu siwo gblɔ̃m wole le woƒe eʋegbe gbɔgblɔ̃ me. Nusi woe be woyɔa dukɔ siawo katã ƒe Gbe si dom wole le egbe ƒe ŋkekeawo me be GBE dukɔawo. Fɔ̃awo dzo le Tado xoxo, to dziehe nuawo me ʋii heva tso Ƒla du. Fɔ̃awo na ŋkɔ woƒe anyigba la bena Dahome si gɔmee nye Dãƒeme.